WAZIRI MKUU KUWASILISHA BAJETI YA OFISI YA WAZIRI MKUU NA BUNGE KESHO

Waziri Mkuu wa Jamhuri ya Muungano wa Tanzania, Mhe. Kassim Majaliwa, anatarajiwa kuwasilisha hotuba ya Bajeti ya Ofisi ya Waziri Mkuu pamoja na Bunge kwa mwaka wa fedha 2025/2026 leo, Jumatano Aprili 9, kuanzia saa 4:00 asubuhi katika ukumbi wa Bunge jijini Dodoma.

Hotuba hiyo itakuwa ni sehemu muhimu ya mchakato wa kupanga na kuelekeza matumizi ya serikali kwa mwaka ujao wa fedha, ambapo wananchi, wawekezaji na wadau mbalimbali wa maendeleo wanatazamia kusikia vipaumbele vya serikali, mafanikio yaliyofikiwa katika mwaka uliopita, pamoja na mikakati mipya ya kukuza uchumi na kuboresha huduma kwa wananchi.

Taarifa kutoka Ofisi ya Waziri Mkuu zinaeleza kuwa hotuba hiyo itatangazwa moja kwa moja (mubashara) kupitia vyombo mbalimbali vya habari ikiwemo televisheni, redio na mitandao ya kijamii, ili kuwawezesha Watanzania wote kufuatilia kwa karibu mijadala na maamuzi muhimu yatakayowekwa mezani.

Miongoni mwa mambo yanayotarajiwa kupewa kipaumbele katika bajeti hiyo ni ajira kwa vijana, uboreshaji wa miundombinu, elimu, afya, na uimarishaji wa sekta ya kilimo na viwanda kama njia ya kukuza uchumi jumuishi.

Watanzania wameshauriwa kufuatilia hotuba hiyo kwa makini kwani inatoa dira na mwelekeo wa serikali katika kuimarisha huduma za kijamii, kukuza uchumi na kuhakikisha usimamizi bora wa rasilimali za taifa.